.

Messur og athafnir

Sími kirkju: 435 1111  Sóknarprestur: Sr. Geir Waage Sími hjá sóknarpresti: 435 1112 Gsm: 893 2320 Bréfsími: 435 1412 Netfang sóknarprests   Á döfinni í Reykholti

Minningarkort Reykholtskirkju eru til sölu hjá Snorrastofu og einnig kort með myndum af orgeli og kirkjugluggum. Allur ágóði rennur í listskreytingasjóð kirkjunnar.  Myndir af glugganum

Valgerður Bergsdóttir hlaut heiðursverðlaun Myndstefs 2006 fyrir steinda glugga í Reykholtskirkju Fjársöfnun vegna steindra glugga fyrir vígsluafmæli Reykholtskirkju 2006     Kirkja hefur verið í Reykholti frá því í öndverðri kristni. Munu höfðingjar á Breiðabólstöðum hafa stofnað til hennar og eru fimm þeirra taldir prestar í Reykholti unz sá síðasti þeirra seldi Snorra Sturlusyni heimildir að staðnum árið 1206. Um eða fyrir miðja 12tu öld mun hafa verið settur staður í Reykholti. Í því felst að kirkjan eignaðist Reykholt auk margra annarra jarða og eigna.   Frá þeim tíma er Reykjaholtsmáldagi, skrá um eignir og  réttindi kirkju á staðnum. Hann er elzta skjal, sem varðveitt er í frumriti á íslenzkri tungu. Kirkja í Reykholti er með Guði helguð Pétri postula, Maríu móður Guðs, Dionysio biskupi og Barböru meyju. Frá 1297 allt til siðabótar réðu biskupar í Skálholti fyrir staðnum og sátu hann prestar í þeirra umboði. Frá 1550 til 1567 höfðu lögmenn tveir staðinn að léni og nutu tekna kirkjunnar. Var annar þeirra Oddur Gottskálksson, sá er þýddi Nýja Testamentið á íslenzku og prentað var í Hróarskeldu árið 1540.

Nýja kirkjan og Snorrastofa að vetrarlagi

Reykhyltingar Eftir 1567 sat sama ættin staðinn í 185 ár samfleytt. Prestar af þessari ætt voru margir fremstu fræða- og vísindamenn sinnar samtíðar. Síra Jón Halldórsson, kenndur við Hítardal, var prestssonur frá Reykholti og faðir Finns Jónssonar biskups, höfundar Historia Ecclesiastica Islandiae. Hans sonur var Hannes Finnsson, síðasti biskupinn í Skálholti. Þessir feðgar drógu saman mikið fornskjalasafn, sem síðar varð einn stofninn í Þjóðskjalasafni Íslands. Jón Sigurðsson studdist við rannsóknir þeirra er hann gaf út Diplomatarium Islandicum, þ.e. Íslenzkt Fornbréfasafn, og eins í öðrum fræða- og stjórnmálaskrifum sínum. Ættmenn þessir, oft nefndir Reykhyltingar, unnu brautryðjendastarf á sviði tveggja nútíma menningarstofnana: Árnastofnunar og Þjóðskjalasafns. Reykholtskirkja lagði á þessari öld Héraðsskólanum í Reykholti til land og aðstöðu. Arftakar hans á staðnum njóta þeirrar aðstöðu nú.

Sturlungareitur er suðvestanvert við gömlu kirkjunaí kirkjugarðinum

Kirkjubyggingar Talið er að kirkjur í Reykholti til forna hafi allar staðið í kirkjugarðinum og mótar fyrir stæðinu í dæld, sem er austan við leiði síra Guðmundar Helgasonar og frú Þóru Ásmundsdóttur. Þegar tekin var gröf þar á átjándu öld kom upp legsteinn með rúnaáletruninni Snorri. Áletrunin mun hafa máðst af með tímanum og steinninn horfið aftur í jörðu. Gamla kirkjan í Reykholti var reist árið 1887 og sá Ingólfur Guðmundsson, síðar bóndi á Breiðabólstöðum um smíðina. Hún var tekin úr notkun árið 1996. Ný kirkja, teiknuð af Garðari Halldórssyni, var reist í Reykholti á árunum 1988-1996 og vígð á Ólafsmessu á sumar 1996. Kirkjan hefur afar fagran hljómburð og er eftirsótt til tónlistariðkunar. Í safnaðarsal hennar eru haldnar sýningar á sumrin. Í tengslum við kirkjubygginguna reisti söfnuðurinn Snorrastofu.